Kahel

Cheche Lazaro: Senator, what made you decide to join politics nung pinakauna pa?
Manny Villar: Ang gusto ko kasi sa pulitika, magkaiba ang pulitika sa public service.
Cheche Lazaro: Ah hindi po ba magkapareho lang sila?

Nitong nakaraang linggo lang eh nanood kami ng utol at ina ko ng Profiles ni Cheche Lazaro. Napapanood ang programang 'to tuwing Miyerkules ng gabi sa ABS-CBN sa mga alanganing oras kung saan: a) plakda na ang karamihan sa mga aliping sagigilid na may 9-to-5 job kinabukasan, b) naghahanda pa lang sa pagpasok ang mga "makabagong pokpok" sa mga putahan sa Makati, c) kasagsagan ng halinghinga't pulot-gata ng mga pusang galang malilibog na naglalampungan sa kailaliman ng gabi.

Hindi ko alam kung bakit ang mga de-kalidad na dokyumentaring tulad nito eh kelangang iburo at ipalabas kung kelan wala na halos matiyagang nilalang na gustong manood ng TV pero kung ako ang tatanungin ng mga tagapamahala ng istasyon, mas gugustuhin kong ilipat sa mas maagang time slot ang programa ng batikang journalist para mas marami ang makapanood. Mas maige namang maski papano eh magkaroon ng kakarampot na lamang kapaki-pakinabang ang karne sa bungo ng karamihan kesa puro na lang walang kakwenta-kwentang primetime drama at showbiz shit ni Kris Aquino at Boy Abunda ang isinasalaksak sa mga utak natin.

No offense meant sa lahat ng mga malilibog na nahuhumaling sa boobs ni Darna, sa mga nagpapaloko sa kwento ng batang sabog kakakausap sa bathalumang wala namang nakakakita kundi siya, at sa mga fans ni Kris Aquino at Boy Abunda. Ang sa akin lang naman, miserable na ang buhay ko. Hindi ko na kelangang gawing mas miserable pa 'to kakapanood ng kung anu-anong shit na programang hindi naman magiging kapaki-pakinabang sakin.

Back to Cheche Lazaro.

Interesante ang episode nung gabing 'yun dahil isa sa mga matunog na presidentiables ang tampok na paksa. Mangyari pa'y si Manny Villar ang nakasalang sa no-holds-barred na birada ni Cheche Lazaro at napatanga ako sa kung paano ibato ni Lazaro ang mga tanong kay Villar partikular sa kung paano niyang sinupalpal ang sagot ng Nacionalista standard bearer sa kung may pagkakaiba ba ang public service at politics. Sinasabi ko sa'yo, higit pa sa laging nananakot na boses at walanghiyang paghalak sa gitna ng pagbabalita, ganito dapat umasta ang mga brodkaster natin ngayon. Walang bahid ng kaepokrituhan. Matapang. Bilibabol at kredibol.

Marami akong nalaman tungkol kay Manny Villar.

Kung pagsusuutin mo ng bestida ang mayamang senador na 'to, malamang sa malamang eh magiging kawangis niya ang fairy tale character na may curfew sa gabi at maluwang ang nabiling sapatos sa Divisoria. From rags to riches ang imaheng umiikot sa kanyang kampanya at aaminin kong napabilib niya ko sa kung paano siyang nagsumikap sa pag-aaral bilang iskolar sa UP hanggang sa maging bilyonaryong senador ngayon.

Sa lahat ng mga politikong nagtatangkang maluklok sa Malacanang, sinasabing siya ang may pinakahandang makinarya bukod sa manok ng administrasyong kilala ko lang sa nickname na Gibo at kung pagbabasehan ang mga infomercial niya sa TV, radyo at dyaryo, umaabot na raw sa kalahating bilyong piso ang nagasta niya.

Bagay na pinabulaanan naman ni Villar.

Sa pagkakaron niya ng kabiyak na ang pamilya eh kabilang sa mga naglipanang political clan sa Pilipinas, naging madali ang paglipat ng bakod ni Villar mula sa pagiging isang real-estate businessman hanggang sa pagiging isang Las Piñas congressman. Ngunit ang pagiging kabilang niya sa isang political dynasty ring ito ang itinuturong dahilan kung bakit itinuturing siyang trapo ng karamihan.

Sa Kamara, isinulong niya ang mga batas patungkol sa kapakananan ng mga negosyante't mangangalakal pero kung meron sigurong nagawa si Villar na nakatatak pa sa karamihan ng mga Pilipino, eto 'yung mabilisang pagpasa niya ng Erap Impeachment resolution sa Senado para hindi na masopla ng mga kongresistang pro-admin nung mga panahong 'yun.

Kinapanayam ni Cheche Lazaro sa Profiles episode na 'yun si Jamby Madrigal, isa sa mga maingay na bumabatikos sa kakayanan ni Villar upang maging isang pangulo.

Sa tonong walang patumpik-tumpik, sinabi ni Madrigal kung paanong walang sariling paninindigan si Villar bilang isang lider, na siyang naging repleksyon umano ng kanyang pamamalakad noon bilang Senate President. Sa mga isyung kelangan ng agapang desisyon sa Senado, sa halip na iresolba ang argumento eh pinag-rerecess pa raw niya ang session para lang lumamig ang ulo ng magkabilang panig.

Ang resulta: Walang nareresolbang isyu.

Walang pakundangang inakusahan din ni Madrigal ang huli bilang isang manggagamit dahil magaling lamang daw si Villar kapag may kelangan siya sa ibang tao, halimbawa eh kung kelangan niya ng majority vote mula sa kanyang mga kapwa-senador. Siyempre pa, hindi pinaligtas ng babaeng senador na may balak din atang tumakbong pangulo ang pagkakasangkot ni Villar sa C5 scam. Aniya, ginamit ni Villar ang kanyang kapangyarihan bilang isang senador para kumita sa kanyang mga negosyo. Na muli eh matinding pinabulaanan ni Villar.

Ayon kay Madrigal, ang pagiging balimbing at kawalan ng paninindigan daw na ito ni Villar eh isa nang sapat na rason para sabihing walang K ang huli upang maging pangulo.

At nung tinanong ni Lazaro ang posisyon ni Villar sa Reproductive Health bill? Marami siyang salitang inusal bago tuluyang tumbuking hindi siya sang-ayon dito. Hindi ko alam kung naintindihan ko nang maige ang kanyang rason pero sa tono ng kanyang pananalita, parang ibinigay niya ang impresyong takot siyang salungatin ang posisyon ng Simbahang Katolikong may milyun-milyong tagasunod. Na sa ganang akin lang naman eh irrelevant dahil hindi nangangahulugang ang posisyon ng pare eh posisyon ng mga taong nagsisimba rito.

Kung ako ang tatanungin sa kung ano ang impresyon ko sa panayam na iyon, sasabihin kong isa siyang magaling na negosyante higit pa sa kanyang pagiging isang magaling na pulitiko. Eto eh kung isa nga siyang magaling na pulitiko.

At oo, medyo crush ko ang anak niyang si Camille.

Si Manny Villar ang manok ni Willie Revillame.

Ayoko ng Wowowee.

N.B. Para sa may pakialam, sa susunod na Profiles episode eh ang pambato ng administrasyon na si Gibo naman ang kakapanayamin ng magaling na broadcast journalist. Can't wait to see how this one fares.